Cara a igualdade na ciencia: 11 de febreiro

Cada 11 de febreiro celébrase o Día Internacional da Muller e da Nena na Ciencia, data proposta o 15 de decembro de 2015 na Asamblea Xeral das Nacións Unidas. Dende entón e cada ano, persoas do ámbito científico e de xeito totalmente voluntario participan nesta conmemoracíon, que ten como propósito principal visibilizar o traballo das mulleres nas áreas STEM (ciencia, tecnoloxía, enxeñaría e matemáticas). Deste xeito, preténdense crear referentes femininos para a infancia e a mocidade que axuden a que máis nenas e mozas elixan estas disciplinas como o seu camiño profesional. 

No noso instituto cada curso sumámonos a este movemento con diversas propostas que organizamos dentro e fóra do centro. 

O alumnado de 3º de ESO, nunha actividade impulsada polo departamento de física e química, participou o pasado 6 de febreiro na 8ª edición das Xornadas Ciencia e Tecnoloxía en feminino no Parque Tecnolóxico de Galicia. 

O día comezou cun achegamento ao traballo que se realiza en Galicia no sector da madeira grazas á charla impartida por Esther Merlo, Enxeñeira de Montes con máis de 20 anos de experiencia na investigación e innovación tecnolóxica neste ámbito. Despois dunha visita á exposición "Mulleres que cambiaron o mundo", as nosas alumnas e alumnos participaron nun divertido obradoiro sobre os sentidos, impartido pola Enxeñeira Biomédica Iria Ollero, quen tamén se encargou de guiar un Escape Room científico baseado na figura de Hedy Lamarr, actriz de Hollywood e inventora dun sistema de comunicación precursor do wifi. 

Velaquí algunhas imaxes: 

Presentación das xornadas e charla
con Esther Merlo

Obradoiro sobre os sentidos

Escape Room 

O alumnado de 3º de ESO que cursa a materia de Proxecto Competencial asistiu este luns 23 de feb á charla "A túa cociña está chea de química e é sa", impatida por Ángeles Peña Gallego, Decana da Facultade de Química da Universidade de Vigo. Esta actividade, proposta polo departamento de física e química, enlaza co tema que se está a traballar na aula este curso: explorando a química dos alimentos e da cociña. 

Aprendemos a facer esferificacións: técnica gastronómica
que encapsula líquidos en membranas xelatinosas. 

Tamén durante a semana do 9 ao 13 de febreiro o alumnado de 1º de ESO participou nun xogo de pistas na biblioteca organizado polo Departamento de Bioloxía e Xeoloxía. 

Para acompañar esta actividade, o Equipo de Biblioteca montou unha pequena exposición con diversos títulos do noso fondo bibliográfico: algunha novela de aventuras de corte científico, libros de divulgación científica escritos por mulleres e pequenas biografías de mulleres relevantes na historia da ciencia. Convidámosvos a mergullarvos nalgunha destas lecturas.

Novembro: mes da ciencia

En novembro conmemórase o Mes da ciencia, unhas datas nas que os departamentos de ciencias co apoio da Biblioteca e de Vicedirección, organizan cada ano actividades de divulgación científica para achegar estas disciplinas ao noso alumnado nun contexto máis informal que a propia aula. 

A primeira quincena do mes estivo exposta nos corredores do centro a exposición XEAS: Mulleres que estudan a Terra, propiedade da Asociación de Ensinantes de Ciencias de Galicia (ENCIGA) e da sección galega da Asociación Española para a Ensinanza das Ciencias da Terra (AEPECT). O alumnado de bioloxía e xeoloxía de todos os cursos de ESO visitou a mostra resolvendo ao tempo un cuestionario. 

Nas escaleiras do instituto aínda se pode visitar estes días a exposición do CSIC A esfera da auga, unha colección de 20 paneis sobre o mundo da auga, dende a súas propiedades químicas ata o seu papel na historia e a civilización humana. O alumnado de física e química de 2º de ESO percorreu a mostra e resolveu un tríptico-cuestionario sobre a mesma.

Imaxes dos carteis da exposición que se
poden descargar para imprimir aquí.

Alumnado de 2º ESO resolvendo
a guía didáctica da exposición.

A semana do 24 ao 28 de decembro os alumnos e alumnas da materia de Proxecto Competencial de 2º de ESO, coa axuda das profesoras de bioloxía, presentaron no patio cuberto e na biblioteca a actividade Recreos con ciencia. Velaquí algunha imaxe dos experimentos nos que o resto da comunidade educativa puido participar.

"A química da auga"

"Prácticas de microscopía: observación
de estomas e de protozoos".

O xoves 27 de novembro o alumnado do Club de lectura de divulgación científica, organizado polo departamento de física e química, reuniuse para debater arredor da obra ¡Que se le van las vitaminas! de Deborah García Bello. Nesta sesión, empregando un xogo de tarxetas, debatemos e desmontamos algunha crenza popularizada sobre a vitamina C das froitas, a homeopatía e as vacinas. 

Primeira reunión deste curso do
Club de divulgación científica.

O venres 28 de novembro un grupo 32 alumnos e alumnas de física e química de 4º de ESO asistiu un ano máis á Aula Newton, situada na Tecnópole, para participar na actividade Volamos con números: unha aventura aérea. Tamén o mesmo día outro grupo de estudantes do mesmo curso visitou o Laboratorio Oficial de Metroloxía de Galicia. A continuación adxuntamos algunha imaxes de ambas visitas. 

Imaxes das explicacións previas á actividade
final: manexar un simulador de voo.

Instalacións do LOMG situado no Parque Tecnolóxico de Galicia

Como ven sendo habitual estes últimos cursos, o noso instituto participa en outono nas Aulas de Divulgación da UNED, que este ano nos trouxeron dúas interesantes actividades. 

O pasado 2 de decembro o alumnado de 4º de ESO que cursa bioloxía e xeoloxía asistiu ao obradoiro Risco de inundación: A xeoloxía é importante! impartido polas profesoras da Facultade de Ciencias da UNED,  Loreto Antón e Candela Martínez, coa colaboración de Silvia Martín da Universidade Rey Juan Carlos e de Cristina  Martín do IES Antonio Machado de Alcalá de Henares. Esta actividade de carácter práctico, pretende promover a comprensión das inundacións, incluindo a súa orixe e os factores naturais e antrópicos que condicionan a súa magnitude. 

Imaxes do alumnado de 4º de ESO durante a sesión.

E como peche das actividades para conmemorar o mes da ciencia, o alumnado de 4º de ESO que cursa a materia de Proxecto Competencial participou o xoves 4 de decembro no obradoiro Qué é a paleontoloxía? Os dinosaurios na península ibérica, impartido por Adán Pérez, Profesor Titular de Universidade e investigador no Grupo de Bioloxía Evolutiva da UNED. Nesta actividade puidemos coñecer en que consiste a paleontoloxía, as súas diferenzas coa arqueoloxía e que procesos se levan a cabo cos fósiles dende que se atopan nun xacemento ata que se expoñen nun museo.

Alumnado de 4º de ESO da materia de Proxecto Competencial
 participando na actividade.

 

Ciencia sen mitos: explorando o pensamento crítico

Neste curso 2025-2026 continuamos co Club de lectura de divulgación científica dirixido ao alumnado de 4º de ESO. Nas nosas xuntanzas trataremos de desmontar falsas crenzas e de comprender o que nos rodea a través da ciencia.

Escollemos o título ¡Que se le van las vitaminas! (Ed. Paidós, 2018) de Deborah García Bello, un compendio de artigos perfectamente documentados que nos axudarán a analizar distintos mitos presentes na nosa sociedade: desde crenzas sobre a saúde e a alimentación ata tópicos sobre a cosmética ou sobre o medio ambiente. 

Cada lectura será o punto de partida para debater, contrastar información e poñer en práctica o pensamento crítico. A intención non é só descubrir certas ideas preconcebidas na nosa sociedade, senón tamén comprender por que se crean tales ideas e como o coñecemento científico nos axuda a rebatelas e a ser máis libres e conscientes do mundo no que vivimos.

Varios exemplares do noso fondo bibliográfico.
Aquí podedes ler un fragmento.

Explorando a Ciencia dos Medicamentos

Este mes comezan no salón de actos as visitas á exposición Explorando a Ciencia dos Medicamentos, unha mostra froito do traballo realizado polo alumnado da materia de Proxecto Competencial de 3º de ESO baixo a coordinación do Dpto. de Física e Química. 

Nas escaleiras do primeiro andar tamén temos exposta a exposición Entre Moléculas, presentada polo CSIC en 2011 con motivo do Ano Internacional da Química e que se pode descargar para imprimir aquí. 

Velaquí o resumo do proxecto, algunha imaxe do alumnado de 3º ESO A presentando os traballos ao resto da clase e a lectura que propoñemos dende a biblioteca: Todo es cuestión de química (Ed. Paidós, 2016) de Deborah García Bello, Premio Prismas 2017 ao mellor libro de divulgación científica.

Portada da guía didáctica da mostra (elaboración propia)

SINOPSE

Todo es cuestión de química nos invita a observar el mundo con otros ojos para sorprendernos con las maravillas ocultas detrás de todo lo que nos rodea.

Descubre entre sus páginas desde qué son el átomo y la molécula, qué misterios encierra la tabla periódica y cómo se transforman las sustancias, hasta qué es realmente lo "natural" y lo "sintético", cómo funciona una pila, por qué se corta la mayonesa o por qué vemos en color. 

Acompañado de ilustraciones que nos ayudar a comprender mucho mejor las explicaciones, Todo es cuestión de química nos revela que nuestro entorno es todavía más fascinante de lo que aparenta a simple vista y que los experimentos más asombrosos ocurren en nuestra vida cotidiana. 

A contaminación: un problema global

O pasado 28 de marzo o alumnado de 2º de bacharelato B que cursa a materia de Xeografía coa profesora Eva Álvarez, asistiu á conferencia sobre Contaminación impartida por María Fuencisla Mariño Callejo, profesora titular do Dpto. de Ecoloxia e Bioloxía Animal da Facultade de Bioloxía da Universidade de Vigo. 

A contaminación actualmente é un problema global que afecta a distintos medios e seres de diferentes características. Nesta charla fíxose un repaso xeral da historia da contaminación, o seu efecto e as súas posibles soluciós. 

Ao fío desta actividade, organizada polo Dpto. de Xeografía e Historia, recomendamos dende a biblioteca a lectura de Argonauta: Peripecias modernas entre el oceano y el cambio climático (Raspabook, 2020) de Pablo Rodríguez Ros, Licenciado en Ciencias Ambientais e Doutor en Ciencias do Mar. 

Sinopse:

A lo largo de la historia los antiguos navegantes se embarcaban en expediciones hacia los confines más recónditos de la Tierra en búsqueda del conocimiento. Hoy en día, aquellos argonautas se han actualizado hasta convertirse en los intrépidos científicos que se embarcan durante meses en la incesante labor científica de las campañas oceanográficas. 

En estas páginas, Pablo Rodríguez Ros nos guía en su travesía a lo largo de estos años como investigador sobre oceanografía y cambio climático por distintos puntos del planeta. Desde su experiencia única y personal, además de cercana, entenderemos el alcance del impacto del cambio climático y, sobre todo, que aún estamos a tiempo de cambiar las cosas. 

Este libro es como esas historias de aventuras que nos contaban de pequeños, pero este es un viaje real, donde todos y cada uno de nosotros somos los protagonistas, y en el que no debemos olvidar que la vida, como la conocemos hasta ahora, puede ser el viaje más emocionante en el que hayamos embarcado jamás. ¿Seremos capaces de cambiar el rumbo a tiempo?

Masterclass: Física de Partículas coas mans

O CERN (Conseil Européen pour la Recherche Nucléaire) fundouse o 29 de setembro de 1954 co obxectivo de impulsar a cooperación científica en Europa despois da Segunda Guerra Mundial.  Atópase en Suiza, preto de Xenebra e próximo á fronteira con Francia. O seu propósito inicial era a investigación en física de partículas e o desenvolvemento de aceleradores. Aínda que na súa creación participaron 12 países europeos, na acualidade conta con 23 estados membros, entre eles España. 

O CERN alberga o Gran Colisionador de Hadróns (LHC), o maior acelerador de partículas do mundo. Ten unha circunferencia de 27 km e sitúase a 100m baixo terra. 

España desempeña un papel clave no CERN, cunha forte participación nos seus experimentos. En particular, o Instituto Galego de Altas Enerxías (IGFAE) da Universidade de Santiago de Compostela colabora no experimento LHCb que estuda a asimetría entre materia e antimateria no universo.

Cada curso, dende o IGFAE e en colaboración co Grupo Internacional de Divulgación da Física de Partículas, o alumnado de bacharelato dos centros educativos galegos pode participar na Masterclass Internacional "Física de Partículas coas mans".

En representación do IES Ferro Couselo participaron o pasado xoves 6 de marzo Pablo Estévez e Adrián Borrajo, alumnos de 2º de bacharelato acompañados pola súa profesora de física Ana Reboiro.

A masterclass consitiu nunha serie de conferencias sobre a Física de Partículas, ademais dunha sesión práctica por ordenador realizada en grupos na que os estudantes tiñan que traballar con datos reais do experimento LHCb. Os resultados discutíronse por videoconferencia con mozos e mozas de centros doutros países que desenvolveron a actividade de forma simultánea.

Velaquí alguna imaxe e o vídeo-resumo que o IGFAE publicou nas súas redes sociais.

Imaxes tomadas o pasado 6 de marzo na Aula Magna
  da Facultade de Matemáticas da USC

O herbario de Rosalía

O "Herbario de Rosalía“ é unha exposición que vincula a literatura e a botánica froito dun proxecto de investigación realizado dende a Universidade de Santiago de Compostela . A mostra consta de 150 paneis con diversas plantas e flores que inspiraron gran parte da obra da poeta galega Rosalía de Castro. Esta exposición itinerante inaugurouse no Real Xardín Botánico de Madrid no 2022. O mesmo ano a Fundación Rosalía de Castro publicou o libro Nasín cando asplantas nasen. O herbario de Rosalía. 

Imaxe da portada do libro descargada de https://rosalia.gal/

Con motivo da conmemoración do Día de Rosalía o próximo 23 de febreiro, o Equipo de Normalización lingüística propuxo mercar algún exemplar desta publicación para a nosa biblioteca. A partir del elaborou a exposición que estes días podedes ver no vestíbulo do centro.   

Velaquí algunha imaxe:

Mes de febreiro: encontros coa ciencia

En 2015 a Asamblea Xeral das Nacións Unidas escolleu o 11 de febreiro como o Día da Muller e a Nena na Ciencia. Dende entón e cada ano os colexios, institutos, universidades e centros de investigación organizan actividades para resaltar o papel da muller na ciencia e para fomentar as ensinanzas STEM entre as mozas. 

No noso instituto, para conmemorar este día, o alumnado de 1º e 2º de ESO colorearon nas clases de bioloxía e de física e química as ilustracións de Pelopantón, imaxes de diversas mulleres científicas de todos os ámbitos da ciencia. 

O resultado deste traballo recóllese nos carteis que estes días decoran as escaleiras do 1º e do 2º andar.

Durante toda a semana programáronse varias conferencias sobre ciencia. A primeira delas correu a cargo de Ignacio Pérez Juste, Doutor en Química e Profesor Titular na Universidade de Vigo. Na súa intervención, dirixida ao alumnado de física e química de 4º de ESO, falou da relación entre Química e Cine. Tras un percorrido pola historia da fotografía e da séptima arte, mostrounos fragmentos de varias películas do cine clásico como Casablanca, Dr. Jekill e Mr, Hyde, Cinema Paradiso ou A ponte sobre o río Kwai para falarnos de química.

Imaxes da conferencia do pasado 11 de febreiro

O pasado 12 de febreiro, no salón de actos, o alumnado de 2º e de 3º de ESO tivo a oportunidade de achegarse ás matemáticas dunha forma lúdica grazas a charla Gañar, gañar e volver a gañar de Eduardo Sáenz de Cabezón, matemático, profesor universitario, investigador e recoñecido divulgador científico. Presenta o programa de TVE2 Órbita Laika e mantén activa a exitosa canle de YouTube Derivando. 

Imaxes do encontro con Sáenz de Cabezón o pasado 12 de febreiro

Na xornada do venres 14 de febreiro, o alumnado de 4º de ESO participou no obradoiro Matemáticas e Mulleres: de como Dido fixo grande a Cartago impartido por Elvira Hernández e Esther Gil, profesoras e investigadoras no ámbito das matemáticas na UNED. 
 

Imaxes do obradoiro da UNED
do pasado 14 de febreiro

Dende a biblioteca propoñemos para este mes de febreiro esta pequena selección de lecturas do noso fondo biblográfico.

Algunhas lecturas propostas

Xuntanza de Nadal do club de lectura de ciencias

Hoxe tivemos unha nova reunión do club de lectura de ciencias, a última antes do merecido descanso de Nadal.

Seguimos conversando arredor da obra Un científico en el supermercado. Desta vez falamos da ciencia que hai detrás do tenis. O material do que está feita a roupa deportiva, a tensión da cordaxe das raquetas, o ollo de falcón ou a composición da terra da pista central de Roland Garros teñen moito que ver coa ciencia. Falar destes temas axudounos a apreciar como a ciencia e a tecnoloxía inflúe na evolución deste deporte.

Tamén coñecemos as chamadas ciencias 'ómicas' como a xenónima, a proteómica ou a epigenómica, todas elas relacionadas coa bioloxía molecular e a xenética e para as que as matemáticas e a informática son ferramentas indispensables. O autor presenta estas ciencias ao tempo que nos introduce e varias tradicións culturais do noso país como a celebración da noite de San Xoán, as procesións de Semanta Santa ou os castells. Aprendemos que as sales de diversos metais danlle cor aos fogos de artificio, que os raios X ademais de empregrarse no campo da medicina poden usarse nos procesos de restauración de obras de arte, e que unha torre humana non se derrumba grazas a que hai equilibrio de forzas.  

Con esta xuntanza pechamos as actividades da BiblioFerro ata o 2025.

Alumnos e alumnas de 4º ESO A

Encontros científicos polo "Mes da Ciencia"

O alumnado de 1º de bacharaleto asistiu o pasado luns 25 de novembro a unha charla impartida por Fernando Veiga López, doutor en Mecánica de Fluidos pola Universidade Carlos III de Madrid e profesor na Escola de Enxeñaría Aeronáutica e do Espazo no Campus de Ourense. 

Na súa intervención presentou o plan de estudos do Grao en Enxeñaría Aeroespacial, que comezou a impartirse na nosa cidade no curso 2016/2017, titulación coa que se forma a futuros profesionais que se ocuparán do deseño, construción, mantemento e mellora de aeronaves e vehículos espaciais, así como de todo o equipamento, subsistemas e infraestructuras que requiren.

Ademais, Fernando Veiga presentou os proxectos de investigación nos que está implicado o alumnado deste grao así como as oportunidades laborais ás que se pode optar con estes estudos.

Imaxes do encontro con Fernando Veiga (25/11/24)

Tameń o alumnado de ciencias de 1º de bacharetalo participou o xoves 28 de novembro no obradoiro Tira á ruleta: ¿xogamos coa química? impartido por María Luisa Rojas Cervantes e Rosa María Martín Aranda, ambas Catedráticas de Universidade no Dpto. de Química Inorgánica e Química Técnica da Facultade de Ciencias da UNED. 

Nesta actividade achegámonos á táboa periódica dunha forma lúdica. Aprendemos  a historia que hai detrás dalgúns elementos químicos, coñecemos algunhas mulleres destacadas no campo das ciencias, realizamos algún experimento químico e rematamos a xornada cun xogo interactivo.

Esta sesión foi posible grazas á participación do noso instituto nas Aulas de Divulgación da UNED dende o pasado curso. 

Velaquí a crónica que o Centro Asociado Uned Ourense publicou con motivo desta actividade.

Alumnado de 1º de bach participando nos
experimentos propostos (28/11/24)

Mes da ciencia: a herdanza de San Alberto Magno

En novembro celébrase o Mes da Ciencia, unha boa  oportunidade para achegar as disciplinas científicas á cidadanía, poñendo en valor o labor dos investigadores e fomentando a curiosidade e o pensamento crítico en todas as idades. 

A elección deste mes non é casual. Cada 15 de novembro conmemórase a festa de San Alberto Magno, patrón dos científicos e das facultades de ciencias. Foi un filósofo, teólogo e científico do século XIII que destacou pola súa capacidade para unir a fe e a razón, e polo seu interese en múltiples disciplinas como a bioloxía, a astronomía, a xeografía e a alquimia. 

A ciencia tamén ocupa un espazo destacado na literatura galega. Moitos escritores e poetas atoparon inspiración nas marabillas do mundo natural. Na BiblioFerro escollemos os primeiros versos de Carta ás estrelas de Manuel María, pertencente ao poemario Remol (1970) e que podedes ler completo aquí. O asombro  fronte a inmensidade da noite e a lonxanía das estrelas é un sentimento compartido cos científicos cando intentar descifrar os segredos do cosmos. 

Dende este mundo vello e canso

contémplovos, altas estrelas;

flores máxicas, abertas

no gran prado da noite;

soños perdidos no espacio,

irmaos dos soños meus,

dos meus anceios.

Escríbovos en verso coa esperanza 

de que chegue a vós a miña voz:

un chío a penas perceptíbel.

Nestas datas de outono, e con motivo do Mes da Ciencia, institucións, bibliotecas e centros educativos de todo o país organizan diversas actividades de corte científico. No noso instituto os departamentos de ciencias, como cada curso, tamén se suman a esta iniciativa, nesta ocasión con seis propostas que vos resumimos a continuación. 

Esta semana tivo lugar na biblioteca a primeira xuntanza do Club de Lectura de Ciencias que organiza o Dpto. de Física e Química. Falamos da Estación Espacial Internacional, dos aditivos alimentarios, do rendemento físico dos deportistas e das pseudociencias.

Nos corredores do centro pódese visitar ata fin de mes a exposición Exxperimenta en feminino, unha proposta do dpto de bioloxía e da que xa desfrutamos hai varios cursos. A mostra fai un percorrido polo traballo realizado por varias científicas de distintos campos como Isabel Zendal, Margarita Salas ou Antonia Ferrín. O alumnado realizará en grupos un xogo de pistas baseado na información dos carteis.

Tamén esta semana o alumnado de 4º de ESO de física e química visitou un ano máis a Aula Newton da Tecnópole para participar nunha misión de rescate. Empregaron a física e as matemáticas para elaborar unha carta de navegación, demostraron ter boas habilidades para a difícil tarefa de manexar un simulador de voo e moita imaxinación para resolver un reto tecnolóxico.

Imaxes da xornada tomadas na Aula Newton (21/11/24)

O próximo luns 21 de novembro o alumnado de 1º de bacharelato de matemáticas participará nun encontro con Fernando Veiga López, doutor en Mecánica de Fluidos pola Universidade Carlos III e profesor na Escola de Enxeñaría  Aeronáutica e do Espazo no Campus de Ourense.

Imaxe de UVigo

Tamén na próxima semana, o 28 de novembro, o alumnado de 1º de bacharelato que cursa a materia de física e química achegarase á táboa periódica dunha forma lúdica co obradoiro Tira á ruleta: ¿xogamos coa química?. Esta actividade é posible grazas á participación do noso centro por segundo ano consecutivo nas actividades das Aulas de Divulgación da UNED.

Imaxe da actividade do curso pasado

E como peche das actividades do Mes da Ciencia, o alumnado da materia de Proxecto Competencial de 2º de ESO visitará o Parque Botánico de Montealegre. Como complemento ao traballo que os estudantes están a realizar na clase arredor dos Espazos Naturais, participarán na actividade Bosque, unha das propostas dos Programas Educativos do Concello de Ourense. 

A ciencia no club "As catro esquinas do Quinto"

Este curso poñemos en marcha na BiblioFerro o Club de lectura de ciencias. Un grupiño de alumnos e alumnas de 4º de ESO animouse a participar nas xuntanzas que faremos aquí mesmo, a carón da nosa sección de ciencia.

Decorada co gran número pi de cubos de cores, que nos cedeu o departamento de matemáticas, e coas letras que a compañeira María José de Física e Química pintou con moita arte, nesta sección podedes atopar dende títulos de divulgadores e científicos recoñecidos como Xurxo Mariño, J.M Mulet, Juan Luis Arsuaga ou Deborah García Bello, ata pequenas novelas de aventuras con pinceladas de ciencia. Todas estas obras están sinaladas cun punto verde identificativo e algunhas delas propostas como lecturas voluntarias dentro do proxecto lector dos diferentes departamentos de ciencias. 

Nós conversaremos periódicamente sobre Un científico en el supermercado: un viaje por la ciencia de las pequeñas cosas, de José Manuel López Nicolás. Empregando como fío conductor unha remolacha, unha camiseta, unha bebida enerxética ou unha pelota de tenis, mergullarémonos na investigación espacial, na ciencia dos materiais, na  biotecnoloxía, no mundo da medicina e moito máis.  

Lecturas recomendadas ao fío do Proxecto CPInnova EduSaúde

No marco do Proxecto CPInnova EduSaúde, no que participa o noso instituto grazas á implicación do profesor Iago Saco, o departamento de Educación Física organizou o pasado luns 18 de marzo unha xornada lúdico-deportiva na estación de montaña de Manzaneda. Neste enlace podedes ampliar información sobre esta e outras actividades que se están realizando.

Na BiblioFerro seguimos reorganizando e ampliando o noso fondo bibliográfico. Dende o curso pasado tratamos de darlle visibilidade ás seccións de Banda Deseñada e de Ciencias. Nelas contamos con algún  título arredor do deporte e dos hábitos saudables, aspectos clave que se están a desenvolver neste proxecto. 

Velquí as nosas propostas para esta semana: Big in Japan de L. F. Campuzano, cómic que rememora os éxitos do baloncesto español e Comer sin miedo de J. M. Mulet, obra de divulgación que ofrece unha análise científica e documentada da realidade dos alimentos que consumimos.

Obradoiro de primeiros auxilios

Os pasados 13 e 14 de marzo tivo lugar en Expourense o 17º Salón de Prevención e Seguridade Laboral. 

No marco desta feira o alumnado de 2º de bacharelato de bioloxía, xunto coa súa profesora Charo Blanco, participou no obradoiro práctico Aplicación de hemostáticos e torniquetes da man de Brais Ramos López, enfermeiro e TES. 

Nesta xornada aprenderon como atallar sangrados con poucos recursos, como facer vendaxes, como facer un torniquete e tamén nocións básicas sobre como actuar ante unha queimadura. 

Velaquí algunha imaxe da actividade e a nosa proposta dende a BiblioFerro: un vídeo divulgativo da Cruz Vermella.  

Día Internacional das Matemáticas

A celebración do Día de Pi ten a súa orixe en 1988 cando o físico Larry Shaw tomou como referencia os tres primeiros díxitos do número π  para asocialos ao 14 de marzo (March 14 no mundo anglosaxón). 

Na 40ª Conferencia Xeral da UNESCO de 2019 escolleuse esta data como o Día Internacional das Matemáticas, consolidándose así o recoñecemento actual ás Matemáticas polo seu importante papel en multidude de ámbitos de gran impacto na nosa calidade de vida como a saúde, o medio ambiente, a enerxía ou a intelixencia artificial.

Estes días podemos ver no vestíbulo do instituto a exposición que, con motivo deste día, o departamento de matemáticas preparou coa axuda do alumnado de ESO. Velaquí unhas imaxes: 

Dende a biblioferro aportamos a esta conmemoración unha selección de libros de divulgación das Matemáticas do noso fondo bibliográfico.