Pechamos un curso cheo de lecturas

Co final de curso chega tamén o momento de facer balance dunha das actividades máis enriquecedoras da nosa biblioteca: o club de lectura As catro esquinas do Quinto.

 

Ao longo destes meses, o alumnado de ESO e Bacharelato participou con entusiasmo nas reunións periódicas celebradas nos recreos, compartindo impresións, recomendacións e reflexións arredor das lecturas propostas. 

Ademais, tiveron a ocasión de asistir a encontros con autores, formar parte das Tertulias Literarias organizadas polo Concello de Ourense e asistir a representacións teatrais. Estas e outras actividades complementarias do centro converteron a lectura nunha experiencia viva e compartida.

Queremos felicitar ao alumnado pola súa implicación, constancia e interese e tamén, mostramos o noso agradecemento ás profesoras Emma Valado, Pilar Fernández, Ana Reboiro, Almudena Platero e Carme Pérez polo seu traballo e dedicación á hora de coordinar e dinamizar esta iniciativa ao longo de todo o curso.

Como recoñecemento ao esforzo e compromiso do alumnado participante, o  15 de xuño visitamos a vila de Tui con 3º e 4º de ESO e participamos nunha xornada lúdica o día 18 de xuño en Castrelo de Miño con 1º e 2º de ESO.

Con algunha imaxe destas viaxes pechamos a actividade deste blog ata setembro.

Feliz verán e felices lecturas!

Onda Ferro 2025-2026

Ao longo do curso 2025-2026, o grupo de traballo da radio escolar Onda Ferro, constituido dentro do Plan de Formación Permanente do Profesorado (PFPP) e formado por compañeiros e compañeiras de varios departamentos, promoveu a participación do alumnado en diversas actividades relacionadas coa literatura, a ciencia, a cultura e a actualidade. 

No ámbito da promoción da lectura, a serie Más allá del papel, desenvolvida con motivo da Semana do libro, ofreceu unha achega creativa ao mundo literario mediante narracións e contidos radiofónicos que buscan espertar o gusto polos libros e a lectura. Nesta mesma liña, o alumnado de Literatura Universal de 1º de Bacharelato participou na gravación de Un libro nun instante, actividade da que xa demos conta neste artigo. 

A divulgación científica tamén tivo un papel destacado coa entrevista á neurocientífica Conchi Lillo, realizada por alumnas de 3º da ESO, coa conmemoración do Día mundial da nutrición e cunha achega ás enfermidades de transmisión sexual.

A conmemoración do 2 de febreiro pola Candeloria é xa unha actividade consolidada no noso centro co tradicional concurso de crêpes organizado polo departamento de francés. Neste pódscast sobre as receitas desta delicia culinaria podemos escoitar a varios alumnos de 3º de ESO.

Todas estas iniciativas poñen de manifesto o enorme potencial da radio escolar como ferramenta educativa. A través dela, o alumnado aprende a investigar, seleccionar información, elaborar guións, expresarse oralmente e traballar de maneira colaborativa. 

Desde a biblioteca queremos recoñecer e agradecer o traballo desenvolvido polo grupo de radio do PFFP, cuxa dedicación fai posible que Onda Ferro sexa unha voz aberta á cultura, á ciencia, á lectura e á participación de toda a comunidade educativa.

Descubrindo Guimarães

Recentemente, o alumnado de ESO que cursa a materia de portugués como segunda lingua estranxeira, tivo a oportunidade de visitar a cidade de Guimarães. A profesora Maribel Gil quixo compartir connosco unhas liñas sobre esta experiencia, achegándonos aos lugares visitados e ás impresións que deixou esta saída cultural. 

O alumnado de lingua portuguesa visitou Guimarães, cidade do distrito de Braga, o 25 de maio. Guimarães é considerada o berce de Portugal porque nesta vila naceu o seu primeiro rei, Afonso Henriques, e tamén se fraguou a independencia do reino de León, no s. XII, como reza na muralla: “Aquí nasceu Portugal”. 

Pola mañá visitaron a Citânia de Briteiros, castro da Idade de Ferro. Ocuparon a tarde en ver o Castelo de Guimarães, onde se cre que naceu o rei Afonso, o Pazo dos Duques de Bragança e a Igrexa de San Miguel e en pasear polo centro histórico da cidade, declarado Patrimonio Mundial da Unesco no 2001, percorrendo as súas rúas e prazas como o Largo do Toural ou o Largo da Oliveira e, por suposto, a famosa muralla.