Mamma Mia! chega ao Auditorio de Ourense

Onte, 22 de setembro, o alumnado de 4º de ESO tivo a oportunidade de asistir no Auditorio de Ourense á representación do musical Mamma Mia!, a cargo do alumnado do IES Taboada Chivite de Verín. 

A actividade, proposta polo Equipo de Dinamización Lingüísitca, permitiunos desfrutar dun espectáculo que utiliza como fío condutor as cancións do grupo sueco ABBA.

Dende a BiblioFerro queremos destacar o gran traballo realizado polo alumnado e profesorado do Taboada, froito de moitas horas de dedicación é ensaios.

Para que vos adentredes neste xénero, velaquí unha selección dos 60 mellores musicais da historia do cine. 

Imaxes do evento por cortesía de Carme Pérez

Benvida a un novo curso na BiblioFerro

Co comezo dun novo curso, a Biblioteca do IES Ferro Couselo retoma a súa actividade e abre de novo as súas portas a toda a comunidade educativa. Trátase dun espazo destinado non só á lectura e ao préstamo de libros, senón tamén á consulta de materiais, ao estudo e ao desenvolvemento de diferentes actividades. 

Permanecerá aberta para o alumnado de luns a venres durante o tempo de lecer de 11:00 a 11:40 con acceso pola porta do patio traseiro. O profesorado tamén poderá dispoñer deste espazo durante o horario lectivo, previa consulta da súa dispoñibilidade. 

Ao longo do curso desenvolveranse distintas iniciativas nas que o alumnado pode participar. Entre elas atópase o Programa de Voluntariado nas Bibliotecas Escolares (as persoas interesadas poden anotarse na propia biblioteca) e a colaboración no mercado solidario de libros.

O papel da lectura compartida e o debate terá un papel destacado, pois as sesións do club As catro esquinas do Quinto realízanse normalmente no noso recanto dedicado á lectura libre.

Lembrade que a biblioteca conta cun fondo variado para o préstamo de libros, no que se poden atopar exemplares de diferentes xéneros. Destacan as seccións específicas de banda deseñada e de divulgación científica.

Agardamos que este novo curso a BiblioFerro continúe a ser un espazo de encontro, aprendizaxe e participación. Animamos especialmente ao profesorado e alumnado novo no centro a facer usos dos seus recursos e a propoñer e participar en diversas actividades. 

Pechamos un curso cheo de lecturas

Co final de curso chega tamén o momento de facer balance dunha das actividades máis enriquecedoras da nosa biblioteca: o club de lectura As catro esquinas do Quinto.

 

Ao longo destes meses, o alumnado de ESO e Bacharelato participou con entusiasmo nas reunións periódicas celebradas nos recreos, compartindo impresións, recomendacións e reflexións arredor das lecturas propostas. 

Ademais, tiveron a ocasión de asistir a encontros con autores, formar parte das Tertulias Literarias organizadas polo Concello de Ourense e asistir a representacións teatrais. Estas e outras actividades complementarias do centro converteron a lectura nunha experiencia viva e compartida.

Queremos felicitar ao alumnado pola súa implicación, constancia e interese e tamén, mostramos o noso agradecemento ás profesoras Emma Valado, Pilar Fernández, Ana Reboiro, Almudena Platero e Carme Pérez polo seu traballo e dedicación á hora de coordinar e dinamizar esta iniciativa ao longo de todo o curso.

Como recoñecemento ao esforzo e compromiso do alumnado participante, o  15 de xuño visitamos a vila de Tui con 3º e 4º de ESO e participamos nunha xornada lúdica o día 18 de xuño en Castrelo de Miño con 1º e 2º de ESO.

Con algunha imaxe destas viaxes pechamos a actividade deste blog ata setembro.

Feliz verán e felices lecturas!