Encontros arredor da obra "Runrún"

A semana pasada o alumnado do club de lectura de 1º de bacharelato reuniuse para comentar a obra Runrún (Ed. Galaxia, 2024) de Ana Varela.

O xoves 5 de marzo xa tiveran a oportunidade de escoitar á autora no Liceo de Ourense, xa que foi a obra elixida este ano nas Tertulias Literarias en galego do Concello.

A sáude mental, os coidados, os prexuízos ou as relacións familiares foron algúns dos temas que saíron da primeira lectura; outros como o amianto, o cancro ou a loita sindical quedaron para aprodundar na seguinte reunión.

Velaquí imaxes de ambas actividades impulsadas polas profesoras Carme e Maribel.

Sinopse:

Tras a prematura morte dos seus pais, Aldara sofre un episodio psicótico, e a súa irmá, Uxía, faise cargo, soa, da situación. Esta é a historia de Uxía, unha xanela para asomarnos á súa vida. Apenas unhas horas que nos deixan ver os seus afectos, os escollidos e os que veñen dados, que por veces se volven caníbales, das circunstancias e dos prexuízos que nos atrapan, e de como todo pode virar nun momento, do fácil que é estar no outro lado do espello, iso que tanto tememos.

Alberto Mancebo nas Tertulias Literarias

Un ano máis un grupo de alumnos e alumnas do Club de lectura, acompañados das profesoras de galego Carme e Maribel, asistiu na tarde do 3 de abril no Liceo ao Ciclo de Tertulias Literarias para estudantes que organiza o Concello e a Diputación de Ourense. 

O escritor e periodista Alberto Mancebo presentou a súa última obra Indolente (Ed. Xerais, 2024) e abriu un debate posterior co alumnado e profesorado asistente.

Velaquí algunha imaxe.

Sinopse

Estamos no ano 2041 e o Ministerio da Presidencia acaba de emitir un comunicado para alertar a cidadanía dunha gran tormenta xeomagnética causada por unha erupción solar que afectará o planeta nas próximas horas. Este contundente fenómeno atmosférico xa sucedera sete anos antes, con intensas auroras boreais atravesando o ceo de todo o mundo e con fallos xeneralizados nos sistemas de comunicación e de subministración eléctrica. Nora lembra agora aquela situación límite, mentres intenta cargar o seu coche nunha electrolineira de Negreira para chegar a Santiago canda a súa muller e as súas fillas cos equipos de urxencia que lles poden salvar a vida. Mais a viaxe non será doada. 

Alberto Mancebo crea unha poderosa e inquietante narración cunha atmosfera hipnótica e abafante para enfrontarnos a unha historia de ameazas climáticas que sitúan os personaxes nun escenario agónico e ante a necesidade de se decidiren entre a solidariedade ou a supervivencia individual.

Tertulia literaria arredor de 'Los incomprendidos'

O pasado 9 de maio o alumnado do club de lectura de 4ºESO e 1º de bacharelato participou nas Tertulias Literarias organizadas polo Concello de Ourense.

A obra escollida nesta ocasión foi Los incomprendidos, do autor Pedro Simón. 

Grazas á implicación das profesoras do Dpto de Lingua Castelá o alumnado achegouse ao Liceo de Ourense a debater arredor da novela, xuntanza na que tamén participaron estudantes do IES de Allariz. 

Queda pendente que nos visite o autor o vindeiro curso.

Tertulias literarias: encontro con Paula Carballeira

A semana pasada as profesoras de lingua galega e de lingua castelá acudiron cun grupo de alumnos ao Liceo de Ourense para participar nas Tertulias Literarias, actividade organizada polo Concello de Ourense e na que participa dende hai varios cursos o IES Ferro Couselo xunto a outros centros educativos da provincia. 

Imaxe obtida de https://ourense.gal/es/saladeprensa

Nesta ocasión a lectura escollida polo grupo de traballo do que forman parte 35 docentes foi As alumnas de Paula Carballeira,  obra do xénero teatral pola que a autora recibiu o Premio Nacional de Literatura Dramática 2023.

As profesoras impulsoras desta actividade valoran moi positivamente a participación e a implicación do alumnado na mesma.

Mostramos aquí algunha imaxe das dúas sesións realizadas os pasados 24 e 25 de xaneiro pola tarde.

Primeira sesión: posta en común de experiencias 
arredor da obra (Sala de Tertulias do Liceo)

Segunda sesión: encontro coa autora e sinatura
de libros (Salón Nobre do Liceo)