Encontros científicos polo "Mes da Ciencia"

O alumnado de 1º de bacharaleto asistiu o pasado luns 25 de novembro a unha charla impartida por Fernando Veiga López, doutor en Mecánica de Fluidos pola Universidade Carlos III de Madrid e profesor na Escola de Enxeñaría Aeronáutica e do Espazo no Campus de Ourense. 

Na súa intervención presentou o plan de estudos do Grao en Enxeñaría Aeroespacial, que comezou a impartirse na nosa cidade no curso 2016/2017, titulación coa que se forma a futuros profesionais que se ocuparán do deseño, construción, mantemento e mellora de aeronaves e vehículos espaciais, así como de todo o equipamento, subsistemas e infraestructuras que requiren.

Ademais, Fernando Veiga presentou os proxectos de investigación nos que está implicado o alumnado deste grao así como as oportunidades laborais ás que se pode optar con estes estudos.

Imaxes do encontro con Fernando Veiga (25/11/24)

Tameń o alumnado de ciencias de 1º de bacharetalo participou o xoves 28 de novembro no obradoiro Tira á ruleta: ¿xogamos coa química? impartido por María Luisa Rojas Cervantes e Rosa María Martín Aranda, ambas Catedráticas de Universidade no Dpto. de Química Inorgánica e Química Técnica da Facultade de Ciencias da UNED. 

Nesta actividade achegámonos á táboa periódica dunha forma lúdica. Aprendemos  a historia que hai detrás dalgúns elementos químicos, coñecemos algunhas mulleres destacadas no campo das ciencias, realizamos algún experimento químico e rematamos a xornada cun xogo interactivo.

Esta sesión foi posible grazas á participación do noso instituto nas Aulas de Divulgación da UNED dende o pasado curso. 

Velaquí a crónica que o Centro Asociado Uned Ourense publicou con motivo desta actividade.

Alumnado de 1º de bach participando nos
experimentos propostos (28/11/24)

25N

Bárbara de Carranza morreu nunha praza de Ourense en 1570 asasinada polo seu marido Alonso de Piñeiro. O documento notarial de Fernán Pérez de Lemos e que se conserva no Arquivo Histórico da cidade recolle este caso de violencia machista, un dos máis antigos rexistrados. A súa relevancia no contexto da loita contra a violencia de xénero é a base da mostra que estes días e ata fin de ano se pode visitar nas instalacións do Arquivo. 

Este caso do século XVI fainos tomar conciencia como sociedade sobre a violencia contra as mulleres, unha problemática que trascende fronteiras, culturas e épocas e que reflicte un desequilibrio de poder nas estruturas sociais. 

Para sensibilizar a toda a comunidade educativa sobre a violencia de xénero, o alumnado de ESO durante as sesións de titoría elaborou un mural colaborativo que podedes visitar no vestíbulo da planta soto. Por grupos, escolleron diversas mensaxes e imaxes que plasmaron en globos e que xuntos formaron unha especie de graffiti ao estilo Banksy.

Mural polo 25N. Actividade impulsada
por Vicedirección

Pilar Fernández, coordinadora do Equipo de Biblioteca, creou tres modelos de marcapáxinas que estiveron expostos no vestíbulo da planta baixa. A aceptación por parte da comunidade educativa foi espectacular pois ao final da mañá tan só quedaban uns cantos exemplares.

Marcapáxinas

O Equipo de Normalización Lingüística seleccionou varias obras literarias de autoras como María Reimóndez ou Antía Yáñez e montou unha pequena exposición no taboleiro Aférrate ao galego. Tamén nas sesións de titoría algúns grupos decoraron as portas e as paredes. Velaquí algunha imaxe de ambas mostras.

Taboleiro Aférrate ao galego con motivo do 25N

Aula de 3º ESO B

Encontro con Antía Yáñez

O pasado mércores 13 de novembro visitou o noso centro Antía Yañez (Burela, 1991). Enxeñeira de camiños de formación e escritora de profesión, Antía Yáñez conta con sete obras e varios premios no últimos anos.  

Reuniuse co alumnado de 1º de ESO para falar sobre a súa primeira novela O misterio de Portomarín (2016). Cos grupos de 1º de bacharelato afondou sobre Senlleiras, publicada en 2018 e pola que recibiu o Premio Narrativa Illa Nova. Esta novela, que vai dirixida a un público máis adulto, trata temas de actualidade como as redes sociais, a soidade e a violencia de xénero. Ambas obras forman parte das lecturas propostas polas profesoras do Dpto. de Lingua Galega e impulsoras desta actividade.