Novembro: mes da ciencia

En novembro conmemórase o Mes da ciencia, unhas datas nas que os departamentos de ciencias co apoio da Biblioteca e de Vicedirección, organizan cada ano actividades de divulgación científica para achegar estas disciplinas ao noso alumnado nun contexto máis informal que a propia aula. 

A primeira quincena do mes estivo exposta nos corredores do centro a exposición XEAS: Mulleres que estudan a Terra, propiedade da Asociación de Ensinantes de Ciencias de Galicia (ENCIGA) e da sección galega da Asociación Española para a Ensinanza das Ciencias da Terra (AEPECT). O alumnado de bioloxía e xeoloxía de todos os cursos de ESO visitou a mostra resolvendo ao tempo un cuestionario. 

Nas escaleiras do instituto aínda se pode visitar estes días a exposición do CSIC A esfera da auga, unha colección de 20 paneis sobre o mundo da auga, dende a súas propiedades químicas ata o seu papel na historia e a civilización humana. O alumnado de física e química de 2º de ESO percorreu a mostra e resolveu un tríptico-cuestionario sobre a mesma.

Imaxes dos carteis da exposición que se
poden descargar para imprimir aquí.

Alumnado de 2º ESO resolvendo
a guía didáctica da exposición.

A semana do 24 ao 28 de decembro os alumnos e alumnas da materia de Proxecto Competencial de 2º de ESO, coa axuda das profesoras de bioloxía, presentaron no patio cuberto e na biblioteca a actividade Recreos con ciencia. Velaquí algunha imaxe dos experimentos nos que o resto da comunidade educativa puido participar.

"A química da auga"

"Prácticas de microscopía: observación
de estomas e de protozoos".

O xoves 27 de novembro o alumnado do Club de lectura de divulgación científica, organizado polo departamento de física e química, reuniuse para debater arredor da obra ¡Que se le van las vitaminas! de Deborah García Bello. Nesta sesión, empregando un xogo de tarxetas, debatemos e desmontamos algunha crenza popularizada sobre a vitamina C das froitas, a homeopatía e as vacinas. 

Primeira reunión deste curso do
Club de divulgación científica.

O venres 28 de novembro un grupo 32 alumnos e alumnas de física e química de 4º de ESO asistiu un ano máis á Aula Newton, situada na Tecnópole, para participar na actividade Volamos con números: unha aventura aérea. Tamén o mesmo día outro grupo de estudantes do mesmo curso visitou o Laboratorio Oficial de Metroloxía de Galicia. A continuación adxuntamos algunha imaxes de ambas visitas. 

Imaxes das explicacións previas á actividade
final: manexar un simulador de voo.

Instalacións do LOMG situado no Parque Tecnolóxico de Galicia

Como ven sendo habitual estes últimos cursos, o noso instituto participa en outono nas Aulas de Divulgación da UNED, que este ano nos trouxeron dúas interesantes actividades. 

O pasado 2 de decembro o alumnado de 4º de ESO que cursa bioloxía e xeoloxía asistiu ao obradoiro Risco de inundación: A xeoloxía é importante! impartido polas profesoras da Facultade de Ciencias da UNED,  Loreto Antón e Candela Martínez, coa colaboración de Silvia Martín da Universidade Rey Juan Carlos e de Cristina  Martín do IES Antonio Machado de Alcalá de Henares. Esta actividade de carácter práctico, pretende promover a comprensión das inundacións, incluindo a súa orixe e os factores naturais e antrópicos que condicionan a súa magnitude. 

Imaxes do alumnado de 4º de ESO durante a sesión.

E como peche das actividades para conmemorar o mes da ciencia, o alumnado de 4º de ESO que cursa a materia de Proxecto Competencial participou o xoves 4 de decembro no obradoiro Qué é a paleontoloxía? Os dinosaurios na península ibérica, impartido por Adán Pérez, Profesor Titular de Universidade e investigador no Grupo de Bioloxía Evolutiva da UNED. Nesta actividade puidemos coñecer en que consiste a paleontoloxía, as súas diferenzas coa arqueoloxía e que procesos se levan a cabo cos fósiles dende que se atopan nun xacemento ata que se expoñen nun museo.

Alumnado de 4º de ESO da materia de Proxecto Competencial
 participando na actividade.

 

25N: por elas

Un ano máis o noso instituto súmase á conmemoración do 25 de novembro,  Día Internacional da Eliminación da Violencia contra a Muller, unha data que nos invita a reflexionar e actuar fronte a todas as formas de violencia que sofren as mulleres na nosa sociedade.

O alumnado de 1º e 2º de ESO creou un mural colectivo coas pegadas das súas mans. Con esta actividade queremos representar de xeito simbólico a unión e o noso compromiso fronte á violencia de xénero. 

Xuntemos as nosas mans: Actividade proposta por Vicedirección
para realizar nas sesións de titoría.

Dende o equipo de biblioteca propoñemos unha pequena selección de obras en galego e en castelán, todas elas procedentes do noso fondo bibliográfico, que tratan este tema. Agradecemos a orixinal aportación de Emma Valado El mujercidio en la literatura, un plano con "estacións" destacadas da literatura universal arredor da violencia de xénero.

Imaxes da exposición realizada coa colaboración
do alumnado voluntario da biblioteca.

O Equipo de Normalización Lingüística propuxo render unha pequena homenaxe ás mulleres asasinadas por violencia de xénero en 2025. Velaquí algunha imaxe da mostra na que colaboraron os grupos de 3º e 4º de ESO.  

#AfférrateáNONviolencia

 

O Samaín chega ao noso instituto

Durante a semana pasada o noso centro celebrou o Samaín cun amplo abano de actividades que combinaron creatividade e posta en valor das nosas tradicións. Na Biblioteca, nas portas de aulas e departamentos, nos corredores e no vestíbulo habitaron por uns días seres malignos, meigas, vasoiras terroríficas, pantasmas, cabazas, esqueletos e outras criaturas e obxectos arrepiantes.

O Equipo de Normalización Lingüística e o Departamento de Galego plantexaron varias actividades coas que afondar na cultura e literarura galegas: concurso de decoración de vasoiras "Varrendo o medo", estudo dos seres malignos da nosa tradición popular, ilustración de portadas de obras literarias galegas arredor do terror e do misterio  e o xa tradicional xogo de pistas para descubrir ao asasino. 

Algunhas portas das aulas de ESO
decoradas durante as sesións de titoría.

Portas dalgúns departamentos

Seres Míticos
Traballo realizado polo alumnado de 1º de ESO
na materia de Lingua Galega

Literatura e medo. Ilustracións realizadas polo
alumnado de 2º de ESO na materia
de Lingua Galega

O Departamento de Plástica destacou especialmente co seu magnífico traballo na aula. O alumnado de ESO traballou coas profesoras Rebeca González e Cristina Sabucedo distintas técnicas para elaborar ilustracións inspiradas no mundo da maxia e do terror. Con elas montouse unha  galería de arte terrorífica. 

Vanitas. Naturezas Mortas.
Traballo realizado polo alumnado de
Expresión Artística de 4º de ESO

Sangue e Ósos
Traballo realizado polo alumnado
de EPeV de 3º ESO

Mi monstruo. Actividade realizada polo
alumnado de EPeV de 1º de ESO

O alumnado do Club de lectura dos diferentes cursos tamén se achegou ao Samaín participando en varias actividades. Entre elas destaca a representación teatral do pasado luns 27 de outubro a cargo dos rapaces e rapazas da materia de Literatura Universal de 1º de bacharelato. Tras o traballo de investigación sobre contos populares galegos, lendas urbanas e relatos literarios, dirixido pola profesora Almudena Platero, adaptaron a teatro o relato El gato negro de Edgar Allan Poe. Da súa excelente posta en escena puideron desfrutar os integrantes do club de lectura de 1º de ESO.

Tamén en 2º de ESO o alumnado do club de lectura participou nunha actividade proposta pola profesora Emma Valado: un xogo de cartas arredor da obra Trece avisos: contos para ler pola noite de Paula Carballeira.  Cada carta contiña unha ilustración relacionada con relatos do libro. Cada un dos tres equipos nos que se dividiu ao grupo escolleu unha carta e a partir dela, traballando de forma conxunta, o alumnado reescribiu o relato. 

E rematamos as actividades do Samaín coa primeira xuntanza do club de lectura de 1º de bacharelato arredor da obra A ladroa da biblioteca de Meirás de Eva Mejuto, unha novela de intriga e misterio que rende homenaxe á historia galega e ao seu patrimonio cultural, actividade dirixida pola profesora Carme Pérez.